"ჩვენი სიცოცხლე და ჯანმრთელობა ამ ქალაქში დაუცველია"

არასამთავრობო ორგანიზაცია "ევროპა ჩვენი სახლია" ამერიკის ელჩს საქართველოში იან კელისა და ევროკავშირის წარმომადგენლობის ხელმძღვანელს მიმართავს. ორგანიზაციის თავმჯდომარე გია გოქაძე ამბობს, რომ ქუთაისში ადამიანები აზრის გამოხატვისათვის ისჯებიან. აღნიშნულის მაგალითად გოქაძეს "ნაციონალური მოძრაობის" ქუთაისის ოფისზე მომხდარი თავდასხმა და არასამთავრობო ორგანიზაცია "საზოგადოებრივი ინტერესების დაცვის ცენტრი"-ს ხელმძღვანელის სულხან ქობულაძის მიმართ მომხდარი ინცინდენტი მოჰყავს.

"ქუთაისში სიტყვის გამოხატვის თავისუფლების კუთხით პრობლემაა. ამ ქალაქში ჩვენი სიცოცხლე და ჯანმრთელობა დაუცველია და მას ყოველდღიურად საფრთხე ემუქრება, რადგან ძალადობის შემოქმედები იმერეთის გუბერნია და ადგილობრივი თვითმმართველობა არიან," - ამბობს გია გოქაძე.

არასამთავრობო ორგანიზაციის ბრალდებებზე ადგილობრივ ხელისუფლებაში კომენტარს არ აკეთებენ.