ზესტაფონში დამოუკიდებელი დეპუტატის მიერ დადგმული სტალინის ძეგლი აიღეს

ზესტაფონის ადგილობრივმა ხელისუფლებამ შორაპანში სტალინის ძეგლის დემონტაჟი მოახდინა. ძეგლი შორაპანში ერთი დღის წინ გაჩნდა. ზესტაფონის გამგებლის ტარიელ თუთარაშვილის თქმით, აღნიშნული გადაწყვეტილება ადგილობრივ მთავრობასთან არ იყო შეთანხმებული და იგი მოსახლეობამ თვითნებურად მიიღო.

" ტერიტორია სახელმწიფო საკუთრებაშია და არავის არ აქვს უფლება რაიმე მონუმენტი დადგას. ადგილობრივი თვითმმართველობა ემიჯნება შორაპანში სტალინის ძეგლის დადგმას. მუნიციპალიტეტს არ გაუცია არანაირი ნებართვა ძეგლის განთავსების შესახებ. მისი დადგმა განხორციელდა ადგილობრივ ხელისუფლებასთან შეთანხმების გარეშე, ფარულად. როგორც თვითმმართველობისთვის ცნობილი გახდა შოროპნის სკვერში, იქ სადაც 1941 –45წ.წ გარდაცვლილთა მემორიალური დაფაა განთავსებული ძეგლი შორაპნის მაჟორიტარმა (დამოუკიდებელმა ) დეპუტატმა კობა გოჩალეიშვილმა მუნიციპალიტეტისგან დამოუკიდებლად, პირადი ინიციატივით, საკუთარი ძალისხმევით დადგა," - აცხადებენ ზესტაფონის მუნიციპალიტეტის გამგეობაში.

ძეგლის დემონტაჟის პროცესის შეჩერებას ცდილობდა კობა გოჩალეიშვილი, რის გამოც სამართალდამცავებმა ის შემთხვევის ადგილიდან წაიყვანეს.