ქუთაისის მერია სოციალურად დაუცველი ოჯახებისთვის ბინების შეძენას აპირებს

ქუთაისის ადგილობრივი ხელისუფლება 40-მდე ბინის შეძენას გეგმავს. როგორც ქალაქის მერიის მიერ გავრცელებულ განცხადებაშია ნათქვამი, ბინები სოციალურად დაუცველ ოჯახებს გადაეცემათ.

"ქალაქ ქუთაისის მუნიციპალიტეტის მერია ატარებს ბაზრის კვლევას. დაინტერესებულ პირთა საყურადღებოდ! მერიას განზრახული აქვს სოციალურად დაუცველ პირთათვის, რომელთაც არ გააჩნიათ საცხოვრებელი, შეიძინოს არანაკლებ 40 ოჯახზე გათვლილი საცხოვრებელი ფართი/შენობა. შენობა უნდა იყოს დასრულებული, გარემონტებული, აღჭურვილი საჭირო ავეჯით და ტექნიკით.

ქალაქ ქუთაისის მუნიციპალიტეტის მერია იწვევს სამშენებლო ფირმების წარმომადგენლებს და ასეევე მათ, ვისაც საკუთრებაში აქვთ დასრულებული და საცხოვრებლად ვარგისი შენობები. ყველა დაინტერესებულ პირს ვთხოვთ მობრძანდნენ ოთხშაბათს, 4 ნოემბერს, რუსთაველის გამზირი #3(ქალაქ ქუთაისის მუნიციპალიტეტის მერია, მეორე სართული) რათა განისაზღვროს ქუთაისის ტერიტორიაზე საცხოვრებლად ვარგისი შენობების სავარაუდო ღირებულება," - ნათქვამია განცხადებაში.