"ქუთაისში კულტურული ცხოვრება გააქტიურდა"

ქუთაისის მერიის კულტურისა და ახალგაზრდობის საქმეთა სამსახური მიმდინარე წლის ბოლომდე ქალაქში სხვადასხვა კულტურული ღონისძიების ჩატარებას გეგმავს. როგორც Topnews.com.ge-ს სამსახურის უფროსმა ვაჟა ჯუღელმა განუცხადა, კულტურული ღონისძიების კუთხით ადგილობრივი ხელისუფლება შემოდგომიდან გააქტიურდა.

"ზაფხულში კულტურული ღონისძიებების ნაკლებობაა, რადგან ხალხი ქალაქიდან გასულია. შემოდგომიდან გავაქტიურდით. საგამოფენო დარბაზ "ვარლა"-ში მხატვართა გამოფენა მიმდინარეობს. 30 ოქტომბერს ორი დიდი ღონისძიება გვაქვს: მესხიშვილის თეატრის სცენაზე ყანჩელის საიუბილეო საღამო და ოპერის თეატრში საღამო ტრიო "თბილისი"-სა და კომპოზიტორ ნანა მესხის ერთობლივი შესრულებით. ვგეგმავთ ოტია იოსელიანისა და გონერ ჭეიშვილის საღამოების ჩატარებას. წლის ბოლომდე თითქმის ყველა დღე დატვირთულია ღონისძიებებით," - ამბობს ვაჟა ჯუღელი.

ცნობისთვის, ქუთაისის მერიის ბიუჯეტში კულტურული ღონისძიებებისათვის მიმდინარე წელს 912 000 ლარია განსაზღვრული.