ქუთაისში პირუტყვი დააპატიმრეს

ააიპ "სპეციალური სერვისები" ქუთაისში, ქალაქის ქუჩებში მოსიარულე მსხვილფეხა რქოსან პირუტყვთან დაკავშირებით განცხადებას ავრცელებს. ორგანიზაცია მოქალაქეებს კუთვნილი პირუტყვის მიმართ ყურადღების გამოჩენისაკენ მოუწოდებს.

"არაერთი გაფრთხილების მიუხედავად, მოსახლეობამ არ გაითვალისწინა ჩვენი თხოვნა მის კუთვნილებაში მყოფი მსხვილფეხა რქოსანი პირუტყვის სათანადო მოვლა-პატრონობის შესახებ და შინაური ცხოველები კვლავ რჩებიან უმეთვალყურეოდ ქალაქის ცენტრალურ უბნებში. აქედან გამომდინარე ა(ა)იპ "სპეციალურმა სერვისებმა" ინტენსიურად დაიწყო პრევენციული ღონისძიებების განხორციელება. დღეს ქალაქის ცენტრში მოხდა რამდენიმე სული პირუტყვის დაჭერა და გადაყვანა სპეციალურ საჯარიმო სადგომზე.



ა(ა)იპ "სპეციალური სერვისები" კიდევ ერთხელ აფრთხილებს მოსახლეობას, არ დატოვონ მათ კუთვნილი შინაური ცხოველები უმეთვალყურეოდ. წინააღმდეგ შემთხვევაში გატარდება კანონით გათვალისწინებული ზომები," – აცხადებენ "სპციალურ სერვისებ"–ში.