ქუთაისში სოციალურად დაუცველ ოჯახებს ზამთრისთვის შეშას ურიგებენ

ა(ა)იპ "სპეციალური სერვისები" ქალაქის მასშტაბით ხეების გადაბელვას ახორციელებს. გადაბელვის შედეგად მიღებულ საშეშე მერქანს სამსახურის თანამშრომლები სოციალურად დაუცველ ოჯახებს ურიგებენ. "სპეციალური სერვისების" წარმომადგენლებმა ზამთრისთვის საჭირო შეშა ტყიბულის ქუჩაზე მცხოვრებ ერთ-ერთ სოციალურად დაუცველბენეფიციარს გადასცეს. როგორც სამსახურში აცხადებენ, პროცესი დაწყებულია და ეტაპობრივად განხორციელდება.

"შეშა ჩვენივე მანქანებით დავურიგეთ სოციალურად შეჭირვებულ ოჯახებს. ორი დღეა რაც ეს პროცესი დავიწყეთ და ის ყველა იმ სოციალურად დაუცველ ოჯახს მოიცავს, ვისაც საშეშე მერქანი სჭირდება," - აცხადებს "სპეციალური სერვისები"-ს საზოგადოებასთან ურთიერთობის სამსახურის ხელმძღვანელი გიორგი მჟავანაძე.