"შეზღუდული შესაძლებლობის მქონე ქალს პოლიციელები გონების დაკარგვამდე გაუსწორდნენ"

შეზღუდული შესაძლებლობის მქონე მაია კეკელიას ზუგდიდის პროკურატურა რამდენიმე პოლიციელი მამაკაცის ცემასა და თავდასხმაში სდებს ბრალს. სამართალდამცავები მის უმკაცრესად დასჯას მოითხოვენ. მუხლი (353 პრიმა მუხლი), რომელიც კეკელიას აქვს წაყენებული, თავისუფლების აღკვეთას 4 წლიდან 7 წლამდე ითვალისწინებს.

"ქალბატონი მაია არის შეზღუდული შესაძლებლობის მქონე, ჯანმრთელობაშერყეული ადამიანი, რომელიც 10 წლის განმავლობაში ინვალიდის ეტლს იყო მიჯაჭვული. მას ჯერ ფიზიკურად, გონების დაკარგვამდე გაუსწორდნენ პოლიციელები და შემდეგ კი იქით დააბრალეს თითქოს მან სცემა რამდენიმე პოლიციელი. ქალბატონმა მაიამ, ინვალიდის ეტლს მიჯაჭვულმა, წარჩინებით დაამთავრა გერმანიის ერთ-ერთი ყველაზე პრესტიჟული უნივერსიტეტი. ის არის ძალიან განათლებული, ნიჭიერი, პატიოსანი, ღირსეული ადამიანი, რომელსაც არასდროს დაურღვევია კანონი და რომლის ცოდნაც ქვეყანამ აუცილებლად უნდა გამოიყენოს! მე მრცხვენია იმ პოლიციელების, რომლებმაც მას ცემა დააბრალეს და საქმე შეუთითხნეს. მრცხვენია, რომ ხშირად სახელმწიფო ასე სასტიკად ექცევა თავის მოქალაქეებს. სიმართლე აუცილებლად გაიმარჯვებს," -ამბობს მაია კეკელიას ინტერესების დამცველი ადვოკატი ტარიელ კაკაბაძე.