სასამართლომ სასაზღვრო პოლიციას გათავისუფლებული თანამშრომლის სამსახურში აღდგენა დაავაალა

„საერთაშორისო გამჭვირვალობა – საქართველო“-ს იურისტების დახმარებით, სასაზღვრო პოლიციიდან გათავისუფლებულმა პირმა სამსახურში დაბრუნება შეძლო.

დღეს თბილისის სააპელაციო სასამართლომ ძალაში დატოვა პირველი ინსტანციის სასამართლოს გადაწყვეტილება, რომლითაც საქართველოს შსს სასაზღვრო პოლიციას დაევალა დავით ცინცაძის თანამდებობაზე აღდგენა და მისთვის იძულებითი განაცდურის ანაზღაურება.

დავით ცინცაძე თანამდებობიდან სასაზღვრო პოლიციაში ჩატარებული რეორგანიზაციის შედეგად გაათავისუფლეს. მოცემულ საქმეზე სასამართლომ დაადგინა, რომ ის შტატი, რომელიც მოსარჩელეს გათავისუფლებამდე ეკავა, შეცვლილი სახელწოდებით, თუმცა ანალოგიური ფუნქციებით დღესაც არსებობს. შესაბამისად, დაუსაბუთებლად იქნა მიჩნეული დავით ცინცაძის თანამდებობიდან გათავისუფლებისა და კადრების განკარგულებაში აყვანის, ასევე სასაზღვრო პოლიციიდან დათხოვნის ბრძანებები და სარჩელი სრულად დაკმაყოფილდა.