"ამათ სისხლი გაყინული აქვთ," -ქუთაისში უკიდურეს გაჭირვებაში მცხოვრებ ოჯახს დახმარება მოუხსნეს

ქუთაისში, შავგულიძის #14-ში მცხოვრები მანანა ფერაძე სოციალურად დაუცველი ადამიანების სიაში უკვე ორი თვეა აღარ ირიცხება. მიუხედავად იმისა, რომ ოჯახის მატერიალური მდგომარეობა მძიმეა, მანანა ფერაძე ორ შვილთან და ყოველდღიურ პრობლემებთან ერთად, სოციალური მომსახურების სააგენტოს გადაწყვეტილებით მარტო რჩება.



"ორი თვეა სოციალური დახმარება არ მიმიღია. ეკონომიურად ძალიან მიჭირს. წნევები მაწუხებს და წამლის ფული არ მაქვს, მეზობლები მყიდულობენ. აბანო არ მაქვს, კედლები ჩამონგრეულია. წყალი ჩამომდიოდა სახლში და მერიამ გადამიხურა ახლახანს. მაღალი ქულები რატომ დამიწერეს, წესიერად ვერ ამიხსნეს. სისხლი გაყინული აქვთ ამათ," - აცხადებს მამანა ფერაძე.



ფერაძეების ოჯახის ყველა წევრი უმუშევარია. ოჯახი თავის გატანას "მადლიერების სახლი"-დან გამოტანილი საკვებით ცდილობს. ფერაძეების ერთადერთი შემოსავალი სოციალური დახმარება იყო.

topnews.com.ge საკითხის გარკვევას სოციალური მომსახურების სააგენტოს იმერეთის წარმომადგენლობაში შეეცადა. წარმომადგენლობის ხელმძღვანელის ნინო ჩირგაძის კომენტარი ფერაძეების ოჯახისთვის არცთუ სახარბიელოა.

" ამ ოჯახს სარეიტინგო ქულა 6 აგვისტოს მიენიჭა.მათ ამ ეტაპზე შეუძლიათ გამოითხოვონ დეკლარაცია და თუ მის რომელიმე პუნქტს არ ეთანხმებიან, შეუძლიათ პუნქტის არასწორობის საბუთი წარმოადგინონ. ოჯახს 99 880 ქულა მიენიჭა და მისი გასაჩივრება ერთი წელი ვერ მოხერხდება,"- ამბობს ნინო ჩირგაძე.

თამუნა სხულუხია