სამტრედიის სოფელში წყლის ძველი მილები მოსახლეობის ინტოქსიკაციის მიზეზი გახდა

სამტრედიის მუნიციპალიტეტის სოფელი ვაზისუბანი წლებია სასმელი წყლის გარეშე ცხოვრობს.

ადგილობრივების განცხადებით, სოფელში უწყლობა ძირითადად წყლის ძველი მილების დაზიანებითაა გამოწვეული, რის გამოც სასმელ წყალს ხშირად ერევა ისეთი მინარევები, რამაც მოსახლეობის მასობრივი ინტოქსიკაცია არაერთხელ გამოიწვია.

"არაერთხელ მივმართეთ ადგილობრივ ხელისუფლებას. სასმელი წყლის პრობლემა წლებია გვაწუხებს. ეხლახანს ტენდერი გამოაცხადეს მაგისტრალის რეაბილიტაციისთვის. ვადა იწურება, მაგრამ სამუშაოები არ დასრულებულა. მიუხედავად გამგებლის წარმომადგენლის, ალექსი ბოცვაძის დაპირებისა, რომ სამუშაოები ტენდერის პირობით გათვალისწინებულ ვადაზე ადრე დასრულდებოდა, ჯერ კიდევ დაუსრულებელ მდგომარეობაშია. ხანგრძლივი შესვენების შემდეგ დღეს განაახლეს სამუშაოები, რომლის ხარისხიანობაც საეჭვოა," - აცხადებს მოსახლეობა.

სამტრედიის ადგილობრივ ხელისუფლებაში აცხადებენ, რომ სოფელ ვაზისუბანში სამუშაოები გაჭიანურდა. მიუხედავად ამისა, მოსახლეობას პრობლემის მოგვარებას უახლოეს მომავალში ჰპირდებიან.