"მეგობრობის არტ-ფაქტი" ქართველი და პოლონელი მხატვრების მონაწილეობით

28 სექტემბრიდან 8 ოქტომბრის ჩათვლით ქუთაისი პოლონელ მხატვრებს მასპინძლობს. პოლონელი მხატვრების ქუთაისში ვიზიტი პროექტ "მეგობრობის არტ-ფაქტი"-ს ფარგლებში ხორციელდება. პროექტი გაცვლითი პროგრამის ფარგლებში, ქუთაისის მერიის მხარდაჭერითა და ააიპ კულტურულ, სახელოვნებო, საგანმანათლებლო დაწესებულებათა გაერთიანების ფილიალის დავით კაკაბაძის სახელობის ქუთაისის სახვითი ხელოვნების გალერეის ორგანიზებით ტარდება.

პროექტში, რომელიც ერთობლივ პლენერს გულისხმობს, ხუთი ქართველი და ხუთი პოლონელი მხატვარი მონაწილეობს. სტუმრები დღეს ქუთაისის ვიცე-მერსა და ადგილობრივი ხელისუფლების წარმომადგენლებს შეხვდნენ.

"პროექტი ტრადიციად იქცა და ის მეხუთე წელია ტარდება. ღონისძიების ფარგლებში დაგეგმილია შემოქმედებითი მუშაობა პლენერზე, მასტერკლასები ჩვენი გაერთიანების ფილიალის, მაისურაძის სახელობის სამხატვრო სკოლის მოსწავლეებთან, ექსკურსიები, რომლებიც პროექტის მონაწილეებს საშუალებას მისცემს ქართული კულტურის გაცნობით მოახდინონ მიღებული შთაბეჭდილებების ინსპირაცია საკუთარ შემოქმედებაში," - ამბობს ააიპ კულტურულ დაწესებულებათა გაერთიანების მმართველი ელისო ქაროსანიძე.

"მეგობრობის არტ -ფაქტი"-ს ფარგლებში შემაჯამებელი გამოფენა 7 ოქტომბერს, ქალაქის ცენტრში, ღია ცის ქვეშ გაიმართება, ხოლო გამოფენაზე გამოტანილი ნამუშევრები კაკაბაძის სახელობის გალერეის ფონდებში დარჩება.

ცნობისთვის, გაცვლითი პროგრამის ფარგლებში, პოლონეთში მომავალ წელს ქართველი მხატვრები გაემგზავრებიან.