ქუთაისის თავისუფალი ინდუსტრიული ზონა დსთ-ს ქვეყნების სავალუტო კრიზისმა აზარალა

დსთ-ს ქვეყნებში სავალუტო კრიზისმა ქუთაისის ინდუსტრიულ ზონას რეალიზაცია შეუმცირა.

როგორც ინდუსტრიული ზონის მმართველი ეგვიპტური „ფრეშის" პარტნიორი აცხადებს, ლარის დევალვაციას მათზე გავლენა არ მოუხდენია, რადგან დოლარზე არიან „მიბმული“, ყველაფერი საზღვარგარეთიდან შემოაქვთ და პირიქით – მასალები გაიაფდა.

მიხეილ თიგიშვილი ამბობს, რომ ზონის ფუნქციონირებაზე უარყოფითად იმოქმედა დსთ-ს ბაზრებზე ეროვნული ვალუტების დევალვაციამ და შედეგად, წინა წელთან შედარებით 30%–იანი კლებაა დაფიქსირებული. თიგიშვილის თქმით, ზონაში ბოლო პერიოდში რეორგანიზაცია მოხდა, თუმცა 3 თვეა სტაბილურად მუშაობენ. მისივე ინფორმაციით, ამჟამად ზონაში 7 კომპანია ფუნქციონირებს და ძირითადად საყოფაცხოვრებო ტექნიკის წარმოება ხდება. თიგიშვილი ამბობს, რომ უკრაინაში მიმდინარე მოვლენების ფონზე ბევრი კომპანია კონფლიქტის ზონებიდან ინტერესდება მათთან საქმიანობით და მოლაპარაკებებიც მიმდინარეობს. ქუთაისის ინდუსტრიული ზონის მმართველი ამბობს, რომ ჯერჯერობით ინდუსტრიულ ზონაში ბევრი მიმართულებაა ასათვისებელი და ზონის მაქსიმალურად დატვირთვის შემდეგ „ფრეში" ახალ ინვესტიციებზეც იფიქრებს.

ქუთაისის ინდუსტრიულ ზონაში პროდუქციის წარმოება 2010 წელს დაიწყო. ზონაში ძირითადად უცხოური კომპანიები არიან და საყოფაცხოვრებო ტექნიკას აწარმოებენ.

commersant.ge