ქუთაისში არსებული საზოგადოებრივი საპირფარეშოები ერთი თვით დაიკეტება

ქუთაისის ადგილობრივი ხელისუფლება ქალაქში არსებული საზოგადოებრივი საპირფარეშოების კეთილმოწყობას იწყებს. აღნიშნული მიზნით ქალაქში არსებული სამი საპირფარეშო ერთი თვით დაიკეტება. როგორც ირკვევა, ადგილობრივმა ხელისუფლებამ სარემონტო სამუშაოებისათვის თანხები უკვე გამოყო. სამუშაოები კი მერიის მიერ ტენდერის შედეგად კომპანიის შერჩევის შემდეგ დაიწყება.

შეგახსენებთ, რომ საზოგადოებრივი საპირფარეშოები ქალაქში დაახლოებით სამი წლის წინ მოეწყო, თუმცა იმის გამო, რომ ობიექტების მეპატრონედ ჯერ გაერთიანებული წყალმომარაგების კომპანია, ხოლო შემდეგ ეკონომიკის სამინისტრო ითვლებოდა, მათი ფუნქციონირება ვერ ხერხდებოდა. დაახლოებით ერთი თვის წინ კი საპირფარეშოები ქალაქის მერიის ბალანსზე გადმოვიდა. ხოლო მერიის გადაწყვეტილებით, ობიექტები ააიპ "სპეციალუი სერვისებ"-ს გადაეცა.