ქუთაისის მერიამ სტუდენტებს ტაო კლარჯეთში ექსპედიცია დაუფინანსა

ქუთაისის მერი შოთა მურღულია მერიის თეთრ დარბაზში ქუთაისის აკაკი წერეთლის სახელმწიფო უნივერსიტეტის სტუდენტებს შეხვდა. მერთან შეხვედრაზე ის სტუდენტები იმყოფებოდნენ, რომლებიც ტაო-კლარჯეთის სამეცნიერო ექსპედიციაში ქუთაისის მერიის თანადაფინანსებით მოხვდნენ.

დიალექტოლოგიური პრაქტიკის გასვლითი ტური საქართველოს უძველეს მხარეში, ჰუმანიტარული ფაკულტეტის ქართული ენისა და ლიტერატურის სპეციალობის 20-მა სტუდენტმა გაიარა. პროფესორ ტარიელ ფუტკარაძისა და ეკა დადიანის ხელმძღვანელობით სტუდენტები 11 დღის განმავლობაში სტუმრობდნენ ადგილობრივ თანამემამულეებს, იწერდნენ დიალექტიკურ ტექსტებს, მეტყველების ნიმუშებს, ეცნობოდნენ წეს-ჩვეულებებს. მათ მოინახულეს ისტორიულ-კულტურული მემკვიდრეობის ქრისტიანული ძეგლები.

ექსპედიცია აგვისტოს თვეში განხორციელდა. იგი მიზნად ისახავდა იმერხევსა და ტაოში მცხოვრებ ქართველებთან კავშირ-ურთიერთობების გაღრმავებასა და ახალი კონტაქტების მოძიებას.