"მუზეუმს კომუნალური ხარჯების ფულიც არ გააჩნია," -ნიკოლაძის სახლ-მუზეუმი შველას ითხოვს

სამტრედიის მუნიციპალიტეტის სოფელ დიდ ჯიხაიშში მდებარე ქართველი პუბლიცისტისა და საზოგადო მოღვაწის, ნიკო ნიკოლაძის სახლ-მუზეუმი დანგრევის საფრთხის წინაშეა.

მუზეუმი, რომელიც ნიკოლაძისეული სახლის ორ ოთახშია განთავსებული, 1951 წლის პირველ ივლისს საზეიმო ვითარებაში გაიხსნა. ამ დროისათვის კი შენობის მდგომარეობა არასახარბიელოა და დროულ ჩარევას საჭიროებს.

როგორც ნიკოლაძის სახლ-მუზეუმში აცხადებენ, დიდი ხნის ლოდინის შემდეგ, მუზეუმის სარესტავრაციო-სარეაბილიტაციო სამუშაოების პირველი ეტაპი მიმდინარე კვირაში დაიწყო. სამუშაოებს კულტურული მემკვიდრეობის დაცვის სააგენტოს მიერ გამოცხადებულ ტენდერში გამარჯვებული შპს "რესტავრატორები და კომპანია" ახორციელებს.

" ამბობენ, რომ ახალ წლამდე უნდა დაამთავრონ სამუშაოები, რომლის ფაქტობრივი ხარჯი გაწერილია 178 ათას ლარზე. პროექტში ბევრი მნიშვნელოვანი რამ არ არის გათვალისწინებული. მათ შორის, რაც მთავარია, არ არის გათვალისწინებული ამ გარემონტებულ მთავარ შენობაში გამოფენის განთავსება ანუ რეექსპოზიცია (ნაწილობრივი, რა თქმა უნდა), რომელიც გარკვეულ (და არც ისე ცოტა) ხარჯებთან არის დაკავშირებული. მუზეუმს კი კომუნალური ხარჯების ფულიც არ გააჩნია!!! ნუთუ იმდენად დაკნინდა ჩვენი საზოგადოება, რომ ამდენი ბიზნესმენ-მეცენატი, ქვეყნის თუ "სოფლის მაშენებელთაგან" ვინმე არ აღმოჩნდება, იმ ტენდერს დაკლებული 22-23 ათასი ლარი არ გაიღოს დიდი ნიკოს მუზეუმის გამოფენის მოწყობისა და სხვა მსხვილმან-წვრილმანი დარჩენილი სამუშაოების დასასრულებლად?!," - აცხადებენ ნიკოლაძის სახლ-მუზეუმში.