ქუთაისელი ვეტერანი ფეხბურთელები ფედერაციის პრეზიდენტის არჩევნებში მონაწილეობას ითხოვენ

ფეხბურთის ფედერაციის პრეზიდენტის არჩევნებში იმერეთის ფედერაციის სახელით ხმას თბილისის "დინამო"-ს ვეტერანი ოთარ კორღალიძე მისცემს. აღნიშნულ ფაქტს ვეტერანი ფეხბურთელები აპროტესტებენ. მათი თქმით, ფეხბურთის იმერეთის ფედერაციის პრეზიდენტს თავად თუ არ სურდა ერთი ხმის უფლებით ესარგებლა, მაშინ კანდიდატი ვეტერან ფეხბურთელებთან შეხვედრის შემდეგ უნდა აერჩიათ.

,,ჩვენი პოზიცია არის ასეთი: ყოფილიყო ქუთაისელ ვეტერანთაგან ერთი, რომელიც ხმის უფლებას მიიღებდა აღმასკომიდან და არ გამოიწვევდა გულისწყრომას," - აცხადებს ვეტერან ფეხბურთელთა კავშირის პრეზიდენტი შოთა ოქროპირაშვილი.

"ჩვენთვის, ვეტერანებითვის ეს არის მიუღებელი და შეურაცხმყოფელი. თუ თბილისის "დინამო"-ს ვეტერანები არიან ვეტერანები, რა დააშავეს ქუთაისის "ტორპედო"-ს ყოფილმა ფეხბურთელებმა. ჩუმად ხმის მიცემის უფლებით ვინმეს აღჭურვა მიუღებელია. პირადად მე ღიად ვაფიქსირებ, რომ მხარს ფეხბურთის ფედერაციის პრეზიდენტის არჩევნებში ლევან კობიაშვილს ვუჭერ," - აცხადებს ქუთაისის "ტორპედო"-ს ვეტერანი ფეხბურთელი დავით რუხაძე.

ფეხბურთის ფედერაციის პრეზიდენტის არჩევნები 3 ოქტომბერს გაიმართება. არჩევნებში გამარჯვებისთვის ფედერაციის ამჟამინდელი გენერალური მდივანი რევაზ არველაძე და ეროვნული ნაკრების ყოფილი კაპიტანი ლევან კობიაშვილი იბრძვიან.