ყაჩაღობის შედეგად დაზარალებულ ადვოკატს ოპერაციისთვის ამზადებენ

ხონის მუნიციპალიტეტის სოფელ მათხოჯში მომხდარი ყაჩაღობის შედეგად დაზარალებული ადვოკატი რობიზონ ხურცილავა მკურნალობის კურსს იმერეთის რეგიონალურ კლინიკურ საავადმყოფოში გადის.

როგორც Topnews.com.ge-ს აღნიშნული სამედიცინო დაწესებულების დირექტორის მოადგილემ ირაკლი გოგინავამ განუცხადა, პაციენტი სახის ძვლების მრავლობითი დაზიანებებით ქირურგიულ განყოფილებაში იმყოფება.

"სტაბილურდ არის. სჭირდება ოპერაცია, რისთვისაც ქირურგიულ განყოფილებაში ემზადება პაციენტი. ჩვენ მიმართული ვართ იქითკენ, რომ რაც შეიძლება ნაკლები დაყოვნება ჰქონდეთ პაციენტებს სტაციონარში," -აცხადებს გოგინავა.

შემთხვევა პირველი სექტემბრის ღამეს, ხონში მოხდა. ხურცილავას ოჯახს თავს ხუთი შეიარაღებული პირი დაესხა, რომლებმაც ადვოკატი და მისი მეუღლე სცემეს, ხოლო სახლიდან ოქროულობა წაიღეს.

შინაგან საქმეთა სამინისტროს პრესსამსახურში აცხადებენ, რომ მომხდართან დაკავშირებით გამოძიება სისხლის სამართლის კოდექსის 179-ე მუხლით მიმდინარეობს, რაც ყაჩაღობას გულიხმობს.