ლარის გაუფასურებამ სასკოლო ნივთების გაძვირება გამოიწვია

ლარის გაუფასურების გამო, საკანცელარიო ნივთები, მათ შორის სასკოლო ინვენტარი, გაძვირდა. ფასი მომატებულია ყველა იმ ნივთზე, რომელსაც საკანცელარიო მაღაზიების წარმომადგენლები საზღვარგარეთ, დოლარში ყიდულობენ.

როგორც კომპანია „ფორმატში“ აცხადებენ, ახალი სასწავლო წლისთვის განკუთვნილი პროდუქცია ჯერ არ მიუღიათ. თუმცა მათივე ინფორმაციით, ფასი მაღაზიაში წარმოდგენილ მთელ ასორტიმენტზე დაახლოებით 20 %-ით უკვე გაიზარდა.

მაღაზიაში ამას ლარის გაუფასურებას უკავშირებენ და აცხადებენ, რომ იმ შემთხვევაში თუ ახალ პროდუქციას დოლარში შეიძენენ, მისი ფასიც შესაბამისად გაიზრდება.

ანალოგიურს აცხადებენ კომპანიაში „ჯორჯიან გრუფ“. მაღაზიაში წარმოდგენილი საკანცელარიო ნივთების ღირებულება 5-20 %-ით გაიზარდა. კომპანიის წარმომადგენლები ამას როგორც დოლარის კურსს, ისე მწარმოებელ ქვეყანაში პროდუქციის თვითღირებულების გაზრდას უკავშირებენ.


commersant.ge