"ქუთაისის ბოტანიკური ბაღი მერის და გუბერნატორის ბოტანიკურ ბუნაგად იქცა"

არასამთავრობო ორგანიზაცია "ევროპა ჩვენი სახლია"–ს დირექტორი გია გოქაძე იმერეთის გუბერნატორისა და ქუთაისის მერის მხრიდან ბოდიშის მოხდას ელოდება. გოქაძე თვლის, რომ მაღალი თანამდებობის პირებს ბოდიშის მოხდა ქუთაისის ბოტანიკურ ბაღში ქეიფისა და დროსტარებისათვის ეკუთვნით.

"მათ შეუძლიათ საჯარო სივრცეში ნებისმიერ დროს მივიდნენ, შევიდნენ და იქეიფონ. ბოტანიკური ბაღია ეგ თუ მაღალი თანამდებობის პირების გართობისა და დროსტარების ბოტანიკური ბუნაგი.ჩვენს მიერ გამოთხოვილ ინფორაციაში ნათქვამია, რომ ყველა ხარჯი განოლებულია, მაგრამ რადგან ისინი აღიარებენ, რომ შევიდნენ იქ და იქეიფეს, ბოდიში უნდა მოეხადათ. ჩვენ რომ ნორმალური ქვეყანა ვიყოთ, აქ დროებითი კომისია შეიქმნებოდა და მერის იმპიჩმენტი დაიწყებოდა. რაც შეეხება ქალაქის საკრებულოს, მინდა ვთქვა, რომ საკრებულო ცოცხალი ადამიანების სასაფლაოა, საიდანაც ხმა არ ისმის," – ამბობს გია გოქაძე.

არასამთავრობო ორგანიზაციის წარმომადგენლის აღნიშნულ განცხადებას ქუთაისის მერიაში არ პასუხობენ. იმერეთის სამხარეო ადმინისტრაციაში აცხადებენ, რომ გუბერნატორსა და მერს ბოანიკურ ბაღში არ უქეიფიათ. სამხარეო ადმინისტრაციის პრესსამსახურში განმარტავენ, რომ მხარისა და ქალაქის პირველი პირები ბოტანიკურ ბაღში საზოგადოებრივი მაუწყებლის ხელმძღვანელ პირებთან ერთად იმყოფებოდნენ. სტუმრების ჩამოსვლა კი იმ ფილმს უკავშირდებოდა, რომელსაც მაუწყებელი საქართველოს შესახებ იღებს.