საჩხერის ორ სოფელში 1 200 ოჯახისთვის წყლის მისაწოდებლად სამუშაოები მიმდინარეობს

საჩხერის მუნიციპალიტეტის სოფლებში სასმელი წყლის სისტემების მშენებლობის პროცესი გრძელდება. სამუშაოეი ამ ეტაპზე სავანესა და ივანწმინდაში მიმდინარეობს. სამუშაოების დასრულების შემდეგ კი 1200 – ზე მეტ ოჯახს სასმელი წყლით უზრუნველყოფის პრობლემა მოუგვარდება.
მიმდინარე სარეაბილიტაციო სამუშაოები იმერეთის გუბერნატორმა გივი ჭიჭინაძემ, პირველმა მოადგილემ პაატა ნადირაძემ, ვიცე–გუბერნატორმა გიორგი ჭიღვარიამ და საჩხერის მუნიციპალიტეტის გამგებელმა მალხაზ ბაზაძემ დაათვალიერეს. სოფელ სავანეში წყლის სისტემის მშენებლობაზე 720 000, ხოლო ივანწმინდაში 250 000 ლარი დაიხარჯება.
საჩხერის მუნიციპალიტეტის სოფელ სავანეში, ასევე კიდევ ერთი მნიშვნელოვანი პროექტი ხორციელდება. აკაკი წერეთლის ძიძისეულ კარ–მიდამომდე მისასვლელ 4 კილომეტრიან მონაკვეთზე ასფალტო-ბეტონის საფარის დაგების სამუშაოები მიმდინარეობს. გზას ტურისტული დატვირთვა აქვს და შესაბამისად, მუნიციპალიტეტში აღნიშნული მიმართულების განვითარებასაც შეუწყობს ხელს. პროექტი რეგიონული განვითარების ფონდიდან 2 008 218 ლარით ფინანსდება.