ქუთაისის მერიამ საზოგადოებისგან იდეების შეგროვება დაიწყო

ქუთაისის ადგილობრივმა ხელისუფლებამ ახალი პროექტი -"შენი იდეა ქუთაისის განვითარებისთვის" დაიწყო. აღნიშნული პროექტი ქუთაისის სტრატეგიული განვითარების გეგმაში გასათვალისწინებელად მოქალაქეებიდან წამოსული იდეების, სურვილების, წინადადებების, რეკომენდაციების სისტემატიზაციასა და ანალიზს ითვალისწინებს. გარდა ამისა, პროექტის მიზანს თვითმმართველობის მუშაობაში მოქალაქეების ჩართულობის ზრდა და სამოქალაქო აქტივობის გაძლიერება წარმოადგენს.

პროექტის ფარგლებში დაგეგმილი აქტივობებია:
- პროექტში ჩართულია ქუთაისის მუნიციპალიტეტის მერიის 50 თანამშრომელი;
- თვითმმართველობის მოხელეთა მიერ მოხდება ქუთაისის 12 ტერიტორიული ორგანოს მიხედვით მოქალაქეთა პირისპირ გამოკითხვა - ანკეტირება მათი იდეების, სურვილების, წინადადებებისა და რეკომენდაციების დადგენის მიზნით;
- მოქალაქეებს საშუალება ექნებათ ქუთაისის სტრატეგიული განვითარების გეგმის ფორმირებისათვის საკუთარი იდეები, წინადადებები, სურვილები და რეკომენდაციები წარადგინოს შემდეგი სახით;
პირისპირ ანკეტირების დროს, საამისოდ არსებულ გადასატან ყუთებში მოთავსებით;
ინტერნეტის საშუალებით web კითხვარით;
ტერიტორიული ორგანოებში ადგილებზე წარდგენით;
ქუთაისის მერიის I სართულზე ტურიზმის საერთაშორისო ცენტრში წარდგენით;
22 ივლისს 12 სთ-ზე აკაკი წერეთლის სახელმწიფო უნივერსიტეტის სააქტო დარბაზში სამოქალაქო ფორუმზე;
ეკონომიკური განვითარებისა და ადგილობრივი თვითმმართველობის ქონების მართვის სამსახური უზრუნველყოფს სამოქალაქო ფორუმის შედეგების სისტემატიზაციას და ანალიზს, რომლის საფუძველზეც მომზადებული პროექტები გათვალისწინებული იქნება ქუთაისის სტრატეგიული განვითარების გეგმაში.