წყლისა და გზის გარეშე დარჩენილი სოფელი წყალტუბოში

წყალტუბოს მუნიციპალიტეტში მდებარე სოფელ ოფურჩხეთს სასმელი და სარწყავი წყლის არქონის გამო, მოსახლეობისგან დაცლა ემუქრება. სოფელს, სადაც 300 კომლი ცხოვრობს, პრობლემა ათეული წელია აწუხებს.



2013 წელს ოურჩხეთში 150 000 ლარის ღირებულების პროექტი განხორციელდა, რის შემდეგაც 130 ოჯახის სასმელი წყლით უზრუნველყოფა მოხდა. სოფლისათვის წყლის სრულად მიწოდების საკითხს, ოფურჩხეთის რთული რელიეფიც ართულებს. გარდა ამისა, ოფურჩხეთში გრანიტის საბადოა და როგორც ადგილობრივები ყვებიან, კერძო კომპანიას კარიერი აქვს გახსნილი. კარიერზე მიმდინარე სამუშაოებმა კი არსებული მთები ჩამოშალა და უწყლობას კიდევ უფრო შეუწყო ხელი.



ადგილობრივები სოფელში საავტომობილო გზის არარსებობასაც აპროტესტებენ. ოფურჩხეთი ქალაქიდან 15 კილომეტრითაა დაშორებული, თუმცა სოფლამდე მისასვლელი გზის დიდი მონაკვეთი ამორტიზებულია. გზის მოწესრიგების მოთხოვნით რამდენიმე დღის წინ მოსახლეობამ საპროტესტო აქცია გამართა და ქუთაისი-ცაგერის სავალი გზის მონაკვეთი გადაკეტა. წყალტუბოს მუნიციპალიტეტის გამგეობაში აცხადებენ, რომ პრობლემა მათთვის ცნობილია და გზის საფარის მოწესრიგების სამუშაოები მალე დაიწყება.

გიორგი აბაზაძე