ქუთაისის მერიაში შოთა მურღულიამ ცოლის ნათესავები, კლასელები და ოჯახის წევრები დაასაქმა

არასამთავრობო ორგანიზაცია "მედიატორის" ქუთაისის ორგანიზაციის წევრები ქუთაისის მერიაში ნეპოტიზმის ფაქტებზე საუბრობენ.
როგორც მათ დღევანდელ ბრიფინგზე განაცხადეს, ქალაქის მერმა შოთა მურღულიამ მერად დანიშვნის შემდეგ მერიასა და მერიას დაქვემდებარებულ სტრუქტურებში საკუთარი ნათესავები, მეგობრები და კლასელები დაასაქმა.
"როგორც კი შოთა მურღულია ქუთაისის მერი გახდა, დაიწყო ნათესავების დასაქმება. მან კლუბ "ტორპედოში" ექიმად დანიშნა საკუთარი ბიძა, ასევე მერიაში ვიცე-მერის თანამდებობაზე დანიშნა საკუთრი კლასელი. მინდა გითხრათ, რომ მერიაში ასევე მუშაობს შოთა მურღულიას მამა. ბევრია შემთხვევები, რომ აქ მისი ცოლის ნათესავებიც მუშაობდნენ,"- აცხადებს "მედიატორის" ქუთაისის ორგანიზაციის წევრი თათია ბოჭორიშვილი.
"მედიატორის" წევრების თქმით, თუ უახლოეს მომავალში ნეპოტიზმით დასაქმებულ ახლობლებს სამსახურიდან არ გაათავისუფლეს, ისინი საპროტესტო აქციებს დაიწყებენ.
ქალაქის მერიაში "მედიატორის" ბრიფინგზე კომენტარს მოგვიანებით გააკეთებენ.