ქუთაისის მერი: მე არ მაქვს ვინმეს ვალი, პატარა კრედიტი მაქვს ბანკში

ქუთაისის საკრებულოს სხდომაზე ხმაური ქალაქის მერიის ააიპ-ებში დაგეგმილმა თანამშრომელთა ატესტაციამ გამოიწვია.
საკრებულოს წევრმა და კოალიცია „ქართული ოცნების“ წარმომადგენელმა ნატო ქათამაძემ ქალაქის ხელისუფლება „ნაციონალების“ კადრებისათვის სამსახურის შენარჩუნებაში დაადანაშაულა.
„რა ვალი აქვს ქალაქს ამ ადამიანების?,“ - განაცხადა ქათამაძემ.
დეპუტატის ბრალდებაზე პასუხის გაცემა საკრებულოს სხდომის დასრულების შემდეგ ქალაქის მერს მოუწია. შოთა მურღულიას განცხადებით, ძლიერი კადრები და კარგი მენეჯერები არ უნდა დაიკარგნონ.
„მე არ ვიცი აქვს თუ არა ქალბატონ ნატოს ვინმეს ვალი. მე არ მაქვს ვინმეს ვალი, მათ შორის ფინანსური. პატარა კრედიტი მაქვს ბანკში,“ - განაცხადა მურღულიამ.