ქუთაისელი სტუდენტები შეგროვებული თანხით სტიქიით დაზარალებულ ოჯახს დაეხმარებიან

თბილისში სტიქიით დაზარალებულთა დასახმარებლად ქუთაისში არაერთი საქველმოქმედო ღონისძიება განხორციელდა და მსგავსი აქტივობები მომავალშიც იგეგმება. საინიციატივო ჯგუფ "PIE GROUP"-ის საქველმოქმედო აქცია ერთ-ერთი მათგანია. ქუთაისის აკაკი წერეთლის სახელმწიფო უნივერსიტეტის სტუდენტები 2 დღის განმავლობაში ქალაქის ცენტრში და ჭავჭავაძის გამზირზე თანხის შეგროვებას თეატრალურ-მუსიკალური პერფომანსების დადგმით ცდილობდნენ.



"ბევრი უკეთილშობილესი ადამიანი შეგვხვდა ამ პერიოდის მანძილზე. ყველა თავისებურად გვეხმარებოდა, იქნებოდა ეს მოხალისეებისთვის საჭირო წყალი და საკვები თუ წარწერებისთვის საჭირო ფურცლები და მარკერები. ერთი სიტყვით მიხარია, რომ მოვახერხეთ ქუთათურების ასე გაერთიანება კეთილი საქმისთვის,"-ამბობს საქველმოქმედო აქციის ორგანიზატორი პაპუნა რევიშვილი.
სტუდენტების მიერ შეგროვებული თანხა ჯერჯერობით 2 155 ლარია, თუმცა საქველმოქმედო აქციის მონაწილეები თანხის რაოდენობის გაზრდას ელოდებიან. როგორც საქველმოქმედო აქციის ორგანიზატორი აცხადებს, ისინი შეგროვებული თანხით თბილისის სტიქიის შედეგად დაზარალებულ ერთ რომელიმე კონკრეტულ ოჯახს დაეხმარებიან, ხოლო რამდენიმე ადამიანის მიერ ნაჩუქარ ხატებს სამების ტაძარს შესწირავენ.

თამუნა სხულუხია