"მუსუსმა" იმერეთის თეატრალურ ფესტივალზე ჭიათურის თეატრს გამარჯვება მოუტანა

ქუთაისის ლადო მესხიშვილის სახელობის სახელმწიფო პროფესიულ თეატრში ფესტივალ „თეატრალური იმერეთი 2015"-ის დახურვის ცერემონია გაიმართა. ფესტივალის მთავარი პრიზი-გრან პრი ჭიათურის აკაკი წერეთლის სახელობის სახელმწიფო დრამატულ თეატრს გადაეცა. გამარჯვებული თეატრი იმერეთის გუბერნატორმა გივი ჭიჭინაძემ დააჯილდოვა. ფესტივალზე, სადაც იმერეთის 12-ე მუნიციპალიტეტის პროფესიული და სახალხო თეატრის დასები იღებდნენ მონაწილეობას, ჭიათურის თეატრი მიხეილ ჯავახიშვილის "მუსუსით" იყო წარმოდგენილი. სპექტაკლი, რომელმაც თეატრს რეგიონის მასშტაბით წარმატება მოუტანა, მოწვეულმა რეჟისორმა კახა გოგიძემ დადგა. აღსანიშნავია, რომ ფესტივალის ერთ-ერთ მთავარ ნომინაციაში „საუკეთესო მსახიობი მამაკაცი“ ჭიათურის თეატრის მსახიობი ამირან ნასყიდაშვილი დაჯილდოვდა.