ქუთაისის ციხეში პატიმარმა პირი ამოიკერა და ხელი დაიჭედა

ქუთაისის ციხეში პატიმარმა პირი ამოიკერა და ხელი დაიჭედა.
პატიმარ ოთარ აფრიდონიძის ოჯახის წევრების თქმით, პროტესტის ამ ფორმით მას მისი უდანაშაულობის დამტკიცება სურს.
პატიმრის დედის თქმით, მისი შვილი გასული წლის 19 ნოემბერს სამართალდამცველებმა უკანონოდ დააკავეს და გაუხსნელი საქმეების საკუთარ თავზე აღება მოსთხოვეს.
„უთხრეს, გაუხსნელი საქმეები შენს თავზე აიღეო, თორემ ხელკეტით გაგაუპატიურებთო. როგორც ჩემმა შვილმა ადვოკატს უთხრა, პოლიციის სამმართველოში გააშიშვლეს კიდევაც და ისე სურდათ მისი წამება. იმ მომენტში იმდენად შეურაცხყოფილი იყო, რომ გაუხსნელი საქმე საკუთარ თავზე აიღო, თუმცა იმის შემდეგ, სიმართლის დამტკიცება გვინდა და ვერ დავამტკიცეთ“, - აცხადებს ირმა აფრიდონიძე.
ცნობისთვის, ბრალდებული ოთარ აფრიდონიძის საქმის არსებითი განხილვა ქუთაისის საქალაქო სასამართლოში მიმდინარეობს. მოსამართლეს საბოლოო განაჩენი ჯერ არ გამოუტანია.