"რეკორდულ მაჩვენებელს მიაღწია სამართალდამცველების მიერ მოლაშქრეთა დაჯარიმების ფაქტებმა"

სალაშქრო სეზონის გახსნის შემდეგ, ცივი იარაღის ტარების გამო მართალდამცველების მიერ მოლაშქრეთა დაჯარიმების ფაქტები გაიზარდა. აღნიშნულთან დაკავშირებით განცხადებას მოლაშქრეთა ეროვნული ფედერცია ავრცელებს.

"სალაშქრო სეზონის გახსნის შემდეგ რეკორდულ მაჩვენებელს მიაღწია სამართალდამცველების მიერ მოლაშქრეთა დაჯარიმების ფაქტებმა ცივი იარაღის ტარების გამო. უკანასკნელი ერთი თვის განმავლობაში ფედერაციაში შემოსულია ინფორმაცია დაჯარიმების ათეულობით შემთხვევის შესახებ. სოლიდური ჯარიმა 200 ლარს შეადგენს. გაცნობებთ, რომ მოლაშქრეთა ეროვნული ფედერაცია აწარმოებს მოლაპარაკებას ყველა იმ სახელმწიფო სტრუქტურასთან, რომელიც აღნიშნულ თემასთან კავშირშია და ცივი იარაღის ტარების აუცილებლობიდან გამომდინარე ვეძებთ ოპტიმალურ გამოსავალს.

მანამდე გთხოვთ გაითვალისწინოთ: ნებისმიერ დასახლებულ პუნქტში, სადაც თავს უსაფრთხოდ გრძნობთ, გთხოვთ ცივი იარაღი შეინახოთ ზურჩანთაში. დაუშვებელია ცივი იარაღის სხეულზე ან ჩანთაზე მიმაგრება (თუნდაც ქარქაშით)," - ნათქვამის ფედერაციის განცხადებაში.