ქუთაისში ტექნოლოგიური უნივერსიტეტის დაარსების მომხრე 10 000 მოქალაქეა

ქუთაისში ტექნოლოგიური უნივერსიტეტის დაარსების მსურველთა რიცხვი დაახლოებით 10 000 ადამიანს აღწევს. მოქალაქეთა საინიციატივო ჯგუფმა, რომელიც ქალაქში ტექნოლოგიური უნივერსიტეტის დაარსების მოთხოვნით ხელმოწერებს აგროვებდა, პროცესი უკვე დაასრულა.
„დავასრულეთ ხელმოწერების შეგროვების პროცესი და წინასწარი მონაცემებით შედეგი გვაქვს მეტად სასიხარულო და შესანიშნავი! გადავლახეთ 10 000-იანი ზღვარი, რაც დამეთანხმებით, მართლაც გასაოცარია იმ პირობებში, რა პირობებშიც ჩვენ ვიყავით. რომ არა თქვენი მონდომება, მხარდაჭერა და გვერდით დგომა ეს შედეგი ნამდვილად ვერ დადგებოდა, რისთვისაც მინდა არა მარტო მადლობა გადაგიხადოთ, ქედი მოვიხარო თქვენს წინაშე! ბევრი თქვენგანის გამამხნევებელი და იმედის მომცემი სიტყვები სტიმული იყო ჩვენთვის ბოლომდე მიგვეყვანა ეს პროცესი, რადგან ამ ხნის მანძილზე გვქონდა უაღრესად რთული პერიოდები, რაზეც საჯარაოდ არ გვისაუბრია და საფრთხეც არსებობდა რომ ეს პროცესი ბოლომდე ვერ მისულიყო, მაგრამ ჩვენ ეს შევძელით!
რა თქმა უნდა, ამით ყველაფერი არ დამთავრებულა და წინ გველის კიდევ უფრო რთული და საინტერესო პროცესი, რადგან მხოლოდ ხელმოწერების შეგროვება საკმარისი არ არის თუ ადრესატამდე ეს ყველაფერი არ მივიდა, არ მივიდა სწორად და იმ სულისკვეთებით, რა სულისკვეთებაც ჩვენ ჩავდეთ ამ ყველაფერში ასე რომ, პერიოდულად გაგაცნობთ დაგეგმილ ქმედებებსა და რა თქმა უნდა შედეგებსაც,“- ამბობს მოქალაქეთა საინიციატივო ჯგუფის ერთ-ერთი წევრი მალხაზ ფხაკაძე.