"ფიროსმანის ნახატების გამოფენამ ქუთაისის კულტურული ცხოვრება გამოაცოცხლა"

ქუთაისის სახელმწიფო ისტორიულ მუზეუმში კულტურული მემკვიდრეობის დაცვის სააგენტოს ინიციატივით, უკვე ერთი თვეა მირზაანის მუზეუმიდან ნიკო ფიროსმანის 14 ფერწერული ტილოა გამოფენილი. გამოფენის ორგანიზატორის თქმით, ამ გამოფენამ მნიშვნელოვნად გამოაცოცხლა არა მარტო მუზეუმის, არამედ მთლიანად ქუთაისის კულტურული ცხოვრება.
ნიკო ფიროსმანის უნიკალურ ნამუშევართა გამოფენას დღეს განსაკუთრებით ბევრი დამთვალიერებელი ესტუმრა.
„ძალიან კარგი საშუალებაა თითოეული ქუთაისელისათვის, რომ ქალაქის დღესასწაულზე გვაქვს შესაძლებლობა გავეცნოთ ფიროსმანის შემოქმედებას. არაჩვეულებრივი შთაბეჭდილება დამიტოვა ნახატების დათვალიერებამ და ყველას მოვუწოდებ, რომ აუცილებლად გამოიყენონ შანსი, მოვიდნენ სახელმწიფო მუზეუმში და დაათვალიერონ ფიროსმანის უნიკალური ნამუშევრები,“ - განაცხადა ერთ-ერთმა დამთვალიერებელმა თინათინ კუპრაშვილმა.
მირზაანის კოლექციის გამოფენა ქუთაისის სახელმწიფო მუზეუმში დღეს სრულდება.

სოფო მანჯგალაძე