ქუთაისში ალტერნატიულ მერს ირჩევენ

ქუთაისში, ქალაქის მასშტაბით გახსნილ სამ საარჩევნო უბანზე ქალაქის მერის არჩევნები მიმდინარეობს.

მერის ალტერნატიული არჩევნები სამეცნიერო-ინტელექტუალური კლუბის „თაობათა დიალოგი“ პროგრამის „ღია თვითმმართველობა 2“-ის ფარგლებში იმართება.

მერის ალტერნატიულ არჩევნებთან დაკავშირებით ქალაქის მასშტაბით სამი საარჩევნო უბანი 12:00 საათიდან 18:00 საათის განმავლობაში იმუშავებს.

არჩევნებისთვის 4 პოლიტიკური პარტია: „ახალგაზრდა ლიბერალები“, „ხალხის პარტია“ „თანამედროვე ალტერნატივა“ და „ცვლილებები დღეს“ ჩამოყალიბდა. თითოეულ პარტიას მერობის კანდიდატი ჰყავს. მაგალითად, „ახალგაზრდა ლიბერალების“ მერობის კანდიდატს ბექა ვირსალაძე წარმოადგენს. „ხალხის პარტის“ მერობის კანდიდატი კობა ნოზაძეა. პარტიები „თანამედროვე ალტერნატივა“ და „ცვლილებები დღეს“ კოალიციის სახით გაერთიანდნენ და მერობის კანდიდატად დავით ალავიძე წარმოადგინეს.

პროგრამის მიზანს ახალგაზრდებში ლიდერული უნარ-ჩვევების განვითარება, თვითმმართველობის პრინციპებისა და მუშაობის გაცნობა, გადაწყვეტილების მიღების
პროცესში ჩართვა, ქალაქის განვითარება და ახალგაზრდული პრობლემების გადაწყვეტის გზების ძიება წარმოადგენს. პროგრამის მონაწილეები აღნიშნავენ, რომ მოდელირებული არჩევნები არაფრით განსხვავდება რეალური არჩევნებისგან, ხოლო თავად ამგვარად საარჩევნო პროცესში ჩართულობასთან დაკავშირებით გამოცდილებას იძენენ.