რის გაკეთებას აპირებს საჯაროდ 2 მაისს ქუთაისის საკრებულოს თავმჯდომარე?

„ტექნოლოგიური უნივერსიტეტი ქუთაისს,“ -ამ სახელწოდებით შესაბამისი ბროშურების დარიგება ქალაქის მოსახლეობაში მიმდინარეობს.
საინიციატივო ჯგუფი, რომელიც ქუთაისში ტექნოლოგიური უნივერსიტეტის დაარსების მომხრეა, აღნიშნული მიზნით ქალაქის მასშტაბით მოსახლეობაში ხელმოწერებს აგროვებს.
ჯგუფის წარმომადგენელი მალხაზ ფხაკაძე ამბობს, რომ ხელმოწერების შეგროვება ძალიან კარგი ტემპით მიმდინარეობს და პროცესი 2 მაისამდე გაგრძელდება. მოქალაქეთა საინიციატივო ჯგუფის წევრების თქმით, ქალაქში ტექნოლოგიური უნივერსიტეტის დაარსების საკითხთან დაკავშირებით ისინი ქალაქის საკრებულოს თავმჯდომარეს დავით დვალს შეხვდნენ, რომლისგანაც მხარდაჭერის პირობა მიიღეს.
"2 მაისს, ქუთაისობაზე ქალაქის ცენტრში ბანერი განთავსდება, სადაც მოქალაქეები მოთხოვნაზე ხელს მოაწერენ. საკრებულოს თავმჯდომარისგან დავით დვალისგან მივიღეთ დაპირება, რომ ქუთაისში ტექნოლოგიური უნივერსიტეტის დაარსების მოთხოვნას მაღალი თანამდებობის პირებთან ერთად, საჯაროდ ხელს ისიც მოაწერს," -აცხადებენ საინიციატივო ჯგუფის წევრები.