ხონის მუნიციპალიტეტის გამგეობა სასამართლოს გადაწყვეტილებას არ ემორჩილება

ხონის მუნიციპალიტეტის გამგეობა სამტრედიის რაიონული სასამართლოს გადაწყვეტილების აღსრულებაზე უარს ამბობს. კერძოდ, სასამართლომ ხონის ადგილობრივ ხელისუფლებას ააიპ ხონის ცენტრალური საბავშვო ბაღის დირექტორის ხათუნა ბახტაძის თანამდებობაზე აღდგენა დაავალა.
როგორც Topnews.com.ge-ს ბახტაძის ადვოკატმა რობიზონ ხურცილავამ განუცხადა, იის იძულებულია სასამართლოს მიმართოს გადაწყვეტილების იძულებითი აღსრულების თხოვნით.

"სამტრედიის რაიონულმა სასამართლომ დააკმაყოფილა ხათუნა ბახტაძის სარჩელი ხონის მუნიციპალიტეტის მიმართ ინდივიდუალურ ადმინისტრაციული აქტის ბათილად ცნობის თაობაზე და იგი აღადგინა ააიპ ხონის ცენტრალური საბავშვო ბაღის დირექტორის თანამდებობაზე.

აღნიშნული გადაწყვეტილებით ხათუნა ბახტაძე დაუყონებლივ აღდგენილი იქნა თანამდებობაზე, თუმცა მუნიციპალიტეტის გამგეობის მიერ ჯერ-ჯერობით არ არის გამოცემული განკარგულება გადაწყვეტილების შესრულებასთან დაკავშირებით, რის გამოც იძულებული ვართ მივმართოთ სასამართლოს გადაწყვეტილების იძულებითი აღსრულების გამო ამოვწეროთ სააღსრულებო ფურცელი. აღნიშნული ქმედება გადაწყვეტილების შეუსრულებლობის ნიშნებს შეიცავს," - აცხადებს ადვოკატი.

ცნობისთვის, ხათუნა ბახტაძე საპარლამენტო უმცირესობის წევრის აკაკი ბობოხიძის რძალია.