2016 წლის მოწვევის პარლამენტში სტუდენტები თავიანთ წარმომადგენელს ითხოვენ

საქართველოს სტუდენტთა უფლებების ლიგამ ახალი პროექტი- „სტუდენტური ხმა საქართველოს პარლამენტში“ დაიწყო. პროექტის მთავარი მიზანია, მთელი საქართველოს მაშტაბით ჩატარდეს სტუდენტებში კვლევა და დასახელდეს სტუდენტების მიერ რეკომენდირებული ადამიანი, რომელიც 2016 წლის საპარლამენტო არჩევნებში გამარჯვების შემთხვევაში, საკანონმდებლო ორგანოში სტუდენტების ინტერესების წარმომადგენელი იქნება.
„გამომდინარე იქედან, რომ საინიციატივო ჯგუფებმა მოგვმართეს თხოვნით დროის გადაწევასთან დაკავშირებით, მივიღეთ გადაწყვეტილება, რომ კანდიდატების წარდგენის ვადა 31 მარტის ნაცვლად 30 აპრილამდე გადაგვეწია. ასე რომ, საქართველოს სტუდენტთა უფლებების ლიგა და პროექტის საორგანიზაციო ჯგუფი საშუალებას ვაძლევთ საინიციატივო ჯგუფებს წარადგინონ კანდიდატები 30 აპრილამდე. გისურვებთ წარმატებებს," -აცხადებს საქართველოს სტუდენტთა უფლებების ლიგის პრეზიდენტი ნოდარ თათვიძე.
აღნიშნულ პროექტს მხარს საქართველოს მაშტაბით არსებული სხვადასხვა უნივერსიტეტის სტუდენტები, არასამთავრობო ორგანიზაციებისა და საინიციატივო ჯგუფების წარმომადგენლები უერთდებიან. მათ შორის არიან „ლიბერალური გზა“, „ლიდერთა კლუბი“, „ახალგაზრდული პოლიტიკური კლუბი“,“ სტუდენტური სამართალი“, საინიციატივო ჯგუფი „სენაკის აქტიური თაობა“ და სხვა.
პროექტში მონაწილეობის მსურველებმა კანდიდატის წარსადგენად ინფორმაცია შემდეგ ელექტრონულ ფოსტაზე უნდა გააგზავნონ: StudenturiKhma@Gmail.com.