საფეხბურთო კლუბ „ზესტაფონის“ მხარდამჭერებმა საპროტესტო აქცია გამართეს

საფეხბურთო კლუბ „ზესტაფონის“ მხარდამჭერებმა საპროტესტო აქცია გამართეს.
აქციის მონაწილეები კლუბის შესაძლო დაშლას აპროტესტებენ და აცხადებენ, რომ უსახსრობის გამო, შესაძლოა, საფეხბურთო კლუბი დაიშალოს.
საფეხბურთო კლუბის ქომაგებმა სტადიონიდან ადგილობრივი მუნიციპალიტეტის შენობამდე ფეხით მსვლელობა მოაწყვეს და ხელისუფლებას კლუბის დაფინანსება მოსთხოვეს.
„ჩვენი თხოვნაა, რომ ზესტაფონის გამგეობამ კლუბის დაფინანსება საკუთარ თავზე აიღოს. წინააღმდეგ შემთხვევაში, შესაძლოა ამ ქალაქში ფეხბურთი განადგურდეს. ადგილობრივ ხელისუფლებას მივმართავ, მიბაძოს სამტრედიის გამგეობას და მოახდინოს კლუბის დაფინანსება“, - აცხადებს აქციის მონაწილე ალეკო ხარატიშვილი.
აქციას ზესტაფონის გამგეობაში გამოეხმაურეს, გამგეობის პრესსამსახურის თქმით, აღნიშნულ საკითხთან დაკავშირებით ფინანსთა სამინისტროში ზესტაფონის გამგებელი და საკრებულოს თავმჯდომარე იმყოფებიან.