ბაღდათის რაიონში ყოფილ პატიმრებს უფასო სამკურნალო-გამაჯანსაღებელი კურსი ჩაუტარდებათ

საქართველოს იუსტიციის სამინისტროს დანაშაულის პრევენციის ცენტრის ბენეფიციარები - ყოფილი პატიმრები (პოლიტპატიმრის სტატუსით) საირმეში სამკურნალო-ბალნეოლოგიური სერვისებით უფასოდ ეტაპობრივად ისარგებლებენ.
სსიპ დანაშაულის პრევენციის ცენტრის ინფორმაციით, 10 დღის განმავლობაში, კურორტ „საირმეში“ პოლიტპატიმრის სტატუსით გათავისუფლებული სამი ყოფილი პატიმარი დაისვენებს.
სამივე მათგანი ე.წ. „ყინწვისის საქმის“ გამო იხდიდა სასჯელს.
იუსტიციის სამინისტროს დანაშაულის პრევენციის ცენტრის დირექტორის ჯონი კვინიკაძის ინფორმაციით, აღნიშნული სერვისით პოლიტიკური პატიმრის სტატუსით გათავისუფლებული ის ყოფილი პატიმრები ისარგებლებენ, ვინც ჩართულია ყოფილ პატიმართა რეაბილიტაციის სახელმწიფო პროგრამაში.
„კურორტი „საირმე“ მხარს უჭერს „ყოფილ პატიმართა რეაბილიტაციისა და რესოციალიზაციის პროგრამას", რადგან მასში ჩართული ბენეფიციარებისთვის გამაჯანსაღებელი/სარეაბილიტაციო კურსი ხელმისაწვდომი გახდეს. ჩვენი ბენეფიციარები სამკურნალო-სარეაბილიტაციო ათდღიან კურსს გაივლიან. ჩაუტარდებათ საჭირო ბაზისური ლაბორატორიული გამოკვლევა, ექიმის დანიშნულებით მიიღებენ სამკურნალო მინერალურ წყლებს და ისარგებლებენ სამკურნალო თერმული აბაზანებით“, განაცხადა ჯონი კვინიკაძემ.
წლის განმავლობაში, ჯამში სულ 48 ყოფილი პატიმარი ისარგებლებს ამ სერვისით. ცნობისთვის, საქართველოს იუსტიციის სამინისტროს მმართველობის სფეროში მოქმედი სსიპ „დანაშაულის პრევენციის ცენტრი“ ახორციელებს „ყოფილ პატიმართა რეაბილიტაციისა და რესოციალიზაციის პროგრამას“. ეს არის პირველი სახელმწიფო პროგრამა ყოფილ პატიმართა დასახმარებლად. მისი მიზანია სასჯელაღსრულების დაწესებულებებიდან გათავისუფლებული პირების რეაბილიტაციის ხელშეწყობა.