ირაკლი ალასანია: ახალგაზრდები საქართველოს მომავლის მშენებლობაში მნიშვნელოვან სიტყვას იტყვიან

პარტია „თავისუფალი დემოკრატების“ ლიდერი ირაკლი ალასანია ქუთაისში სტუდენტებს შეხვდა. შეხვედრა დემოკრატიული ჩართულობის ცენტრში გაიმართა. ალასანიამ ქვეყნის ევროპულ კურსზე და ქვეყანაში შექმნილ მძიმე ეკონომიკურ მდგომარეობაზე ისაუბრა. ასევე უპასუხა სტუდენტების შეკითხვებს.
„მოსახლეობასთან შეხვედრის შემდეგ, ჩვენი საზოგადოების ყველაზე ნათელ და პერსექტიულ ნაწილს შევხვდი - სტუდენტებს. დემოკრატიული ჩართულობის ცენტრში საუბარი იმდენად საინტერესოდ წარიმართა, რომ დაგეგმილზე დიდხანს გაგვიგრძელდა. გვქონდა დიალოგიც, პოლემიკაც და დისკუსიაც. საუბრის მთავარი თემა „ჩვენი დასავლური არჩევანი“ იყო. მე დარწმუნებული ვარ, რომ ახალგაზრდები, რომლებიც დღეს შეხვედრაზე იყვნენ სხვადასხვა უნივერსიტეტებიდან და სასწავლო დაწესებულებებიდან, საქართველოს მომავლის მშენებლობაში მნიშვნელოვან სიტყვას იტყვიან,“ - განაცხადა ირაკლი ალასანიამ.
დღესვე პარტიის ლიდერი ქუთაისში მოქმედ არასამთავრობო ორგანიზაციების წარმომადგენლებს შეხვდა.