ქუთაისის მერიის საბინაო სამსახურის ანგარიში საზოგადოებას

ქუთაისის მერიის საბინაო ინფრასტრუქტურის მართვისა და განვითარების სამსახურის უფროსმა ვლადიმერ ნაკაშიძემ 2014 წლის ანგარიში მედიის და არასამთავრობო ორგანიზაციის წარმომადგენლებს წარუდგინა. შეხვედრას ქალაქის მერი შოთა მურღულია დაესწრო. მან გასულ წელს საბინაო სამსახურის მიერ შესრულებული სამუშაოები შეაფასა.
,,საბინაო სამსახურმა 2014 წელს საქმიანობა საკმაოდ კარგად განახორციელა. მიხარია,რომ ძირითადი სამუშაოები არჩევნების შემდეგ იქნა ჩატარებული, ანუ ეს არჩევნებთან დაკავშირებული არ იყო. პრობლემა რჩება, მაგრამ 2014 იყო გამორჩეული. ჩვენ შევინარჩუნებთ და კიდევ უფრო გავაუმჯობესებთ ტემპს,“-განაცხადა შოთა მურღულიამ.
2014წელს საბინაო ინფრასტრუქტურის მართვისა და განვითარების სამსახურის მიერ 137 ეზოს და 42 მისასვლელი გზის კეთილმოწყობა, 55 ლიფტის რეაბილიტაცია, 28 წყალ-კანალიზაციის კომუნიკაციის გამოცვლა და 65 სადარბაზოს რემონტი განხორციელდა. პროგრამის ფარგლებში ასევე მოხდა ,,ღატაკი“ სტატუსის მქონე 33 ოჯახისათვის სახლის გადახურვა. გადასახური მასალა გადაეცა 170 ბინას. საერთო ჯამში გასულ წელს საბინაო სამსახურის პროექტებში 21 268 ადამიანი იყო ჩართული.