ქუთაისის მერიის ეკონომიკური სამსახურის უფროსის პოსტი არასამთავრობოს კადრმა დაიკავა

"ახალგაზრდა ეკონომისტთა ასოციაციის" იმერეთის ორგანიზაციის ყოფილი ხელმძღვანელი პაატა კლდიაშვილი ქუთაისის მერიის ეკონომიკის განვითარებისა და ადგილობრივი ქონების მართვის სამსახურის უფროსად დაინიშნა. აღნიშნულ პოსტზე კლდიაშვილმა იოსებ გაბრიჭიძე ჩაანაცვლა.
პაატა კლდიაშვილი ეკონომისტთა ასოციაციის იმერეთის ორგანიზაციის თავმჯდომარის თანამდებობაზე მუშაობის დროს ჩართული იყო სხვადასხვა პროექტში, რომელიც ადგილობრივი ხელისუფლების საქმიანობის მონიტორინგს ეხებოდა. კლდიაშვილი ასევე იყო იმერეთის სამხარეო ადმინისტრაციის საკონკურსო კომისიის ერთ-ერთი წევრი.