აკაკი წერეთლის სახელობის მღვიმე იმერეთში

იმერეთში, ახალ აღმოჩენილ კარსტულ მღვიმეს აკაკი წერეთლის სახელი ეწოდა. ახალი მღვიმე “აკაკი წერეთელი” 23 თებერვალს, ივანე ჯავახიშვილის სახელობის თბილისის სახელმწიფო უნივერსიტეტის გეომორფოლოგია, კარტოგრაფიის კათედრის ასისტენტ- პროფესორმა გიორგი დვალაშვილმა გამოიკვლია. მღვიმე საჩხერის მუნიციპალტეტის სოფელ სარეკის ტერიტორიაზე, მდინარე ყვირილას მარცხენა მხარეს, ამავე სოფლის მკვიდრის ბიძინა აბჟანდაძის საკარმიდამო ნაკვეთთან ახლოს არსებული კლდოვან ფარდულში მდებარეობს.
გიორგი დვალაშვილის თქმით, მღვიმე გამომუშავებულია ზედაცარცულ კირქვებში. მღვიმეში შესასვლელი არის კლდოვანი ფარდულით, დაღმავალფსკერიანი, კარსტული გვირაბებისგან შედგება. შემდეგ ეშვება ჩრდილო-დასავლეთით პალეო მდინარის მიმართულებით. მღვიმეში ჰაერის ტემპერატურა არის 14 გრადუსი, გაედინება პატარა ნაკადული. გვირაბის გაფართოებაში დიდ როლს თამაშობს დროებითი ღვარების ჭარბი ნაკადები.
ქიმიური ნალექებიდან მღვიმეში გვხდება სტალაქტიტები, სტალაგმიტები, კალციტის მოფარდაგებანი, მექანიკურრიდან – ნგრევის ადგილობრივი მასალა, გამოფიტვის პროდუქტები, დროებითი ნაკადების მიერ შემოტანილია ალუვიონი.
ახალაღმოჩენილ მღვიმეში ბინადრობენ ობობები, მცირეჯაგრიანი რგოლოვანი ჭიები, მრავალფეხიანები და სხვა ცოცხალი ორგანიზმები.
მღვიმის შესასვლელის სიმაღლე ზღვის დონიდან 455 მეტრი, შეფარდებითი სიმაღლე მდინარე ყვირილას დონიდან კი -75 მეტრი.
მღვიმის სიღრმე 12 მეტრია, ჯამური სიგრძე 45 მეტრი, სიგანე – მინიმალური 1 მ, მაქსიმალური 2,5 მ, სიმაღლე მინიმალური 0,5 მ, მაქსიმალური კი 5 მ. ობიექტი ოთხსართულიან სიღრუეს წარმოადგენს.
"ეს მღვიმე კიდევ ერთი საინტერესო ობიექტი იქნება, როგორც ადგილობრივი ტურისტებისთვის, ასევე უცხოელი ვიზიტორებისთვის. რეგიონისთვის კი დამატებითი შემოსავლის წყარო, თუ კი ხელისუფლება სათანადო ყურადღებას დაუთმობს," - აცხადებს მღვიმის მკვლევარი.
ახალაღმოჩენილ მღვიმეს აკაკი წერთლის სახელი ქართველი მგოსნის დაბადებიდან 175 და გარდაცვალებიდან 100 წლისთავთან დაკავშირებით ეწოდა.