"სიყვარულის ბაღი" და მარადიული სიყვარულის სიმბოლო წყალტუბოში

წყალტუბოში „სიყვარულის ხიდი“ გაიხსნება. ხიდის გახსნის იდეა მუნიციპალიტეტის გამგეობის განათლების, კულტურის, სპორტისა და ახალგაზრდობის საქმეთა სამსახურს ეკუთვნის. სამსახურის უფროსი რიმა მარგიანი ამბობს, რომ ინიციატივას მხარი წყალტუბოს მუნიციპალიტეტის გამგებელმა კონსტანტინე მამისეიშვილმადაუჭირა.

სიყვარულის ხიდზე უკვე დაიდგა გულის ფორმის კონტრუქცია, რომლის მოწყობა გამგეობის ინფრასტრუქტურის სამსახურმა წყალტუბოელი ბიზნესმენის გიზო ბზიკაძის დახმარებით შეძლო. წყალტუბოს გამგებლის თქმით, ხიდის დასაწყისში გაკეთდება აბრა ინგლისურ და ქართულ ენებზე. გარდა ამისა, სიყვარულის ხიდზე არსებულ რკინის გულზე შეყვარებულები სიმბოლურად შეაბამენ ბოქლომებს.

ამბობენ, რომ სიყვარულის ბოქლომების ტრადიცია ჩინეთიდან დაიწყო, ევროპაში კი 2000 წლიდან გავრცელდა. დღეს "ბოქლომების ხიდს" პარიზში, ფლორენციაში, სევილიაში, ლონდონსა და ევროპის სხვა დიდ ქალაქებშიც შეხვდებით. ამ ხიდებზე უკვე ათასობით შეყვარებულმა შეჰფიცა ერთმანეთს სიყვარული. წყვილებმა თავიანთი ინიციალებით მოხატული ფერადი ბოქლომები აქ სამუდამოდ ჩაკეტეს და მარადიული სიყვარულის ნიშნად გასაღები წყალში გადააგდეს.