ქუთაისში მცხოვრები ებრაელები ქალაქში ებრაელთა ცენტრის აშენებას გეგმავენ

ქუთაისში მცხოვრები ებრაელების რაოდენობა ყოველწლიურად მცირდება. დაახლოებით 20 000-მდე ებრაელიდან ამ დროისათვის ქალაქში 230-მდე ებრაელია შემორჩენილი. მათ შორის უმრავლესობას მოხუცები წარმოადგენენ.
ქუთაისში ებრაელთა საზოგადოების ხელმძღვანელი მოსე ბალუაშვილი ამბობს, რომ ებრაელთა რაოდენობის შემცირების გამო, ხშირ შემთხვევაში საერთო ლოცვა არ აღევლინება, რადგან სინაგოგაში ლოცვის აღსავლენად საჭირო ხალხის რაოდენობა (10 კაცი) ვერ იკრიბება.
მოსე ბალუაშვილი იმასაც ამბობს, რომ გაპონოვის ქუჩაზე, ებრაელთა სინაგოგის წინ, ებრაელთა ცენტრის აშენებას აპირებენ.
„ამ საკითხზე ადგილობრივ ხელისუფლებასთან მოლაპარაკებები უკვე გვქონდა. ხელისუფლება წინააღმდეგი არ არის. ჩვენ ინვესტორი უნდა მოვძებნოთ. ცენტრში რესტორანი, სასტუმრო და კინოთეატრი და გასართობი ცენტრი იქნება,“ - ამბობს ბალუაშვილი.
ქუთაისის მერიაში ებრაელთა ცენტრის მშენებლობის საკითხზე ამ დროისათვის კომენტარს არ აკეთებენ. ადგილობრივ ხელისუფლებაში აცხადებენ, რომ საკითხი იდეის დონეზეა.