რას სთავაზობენ სახელმწიფო და ევროკავშირი ფერმერებს?

ევროკავშირის მიერ დაფინანსებული პროგრამის ფარგლებში, 35 მცირე ფერმერული კოოპერატივი გრანტით დაჯილდოვდა. ფერმერებს მატერიალური აქტივების სახით ტრაქტორები, სატვირთო მანქანები, სახნავ-სათესი მოწყობილობები და სხვა აღჭურვილობა გადაეცათ.
დაჯილდოვების ცერემონიალი ქუთაისში, აკაკი წერეთლის სახელმწიფო უნივერსიტეტში გაიმართა.
ევროპის სამეზობლოს პროგრამის სოფლისა და სოფლის მეურნეობის განვითარების პროგრამის ENPARD-ის ფარგლებში, მონაწილეობა 700-ზე მეტმა მცირე ფერმერულმა ჯგუფმა მიიღო. აქედან მეორე ტურისათვის 200-ზე მეტი ჯგუფი შეირჩა. ჯგუფების შერჩევის კრიტერიუმს ბიზნესზე ორიენტირებულობა და კოოპერაციის პოტენციალი წარმოადგენდა.
„მიწის გარეშე სოფლის მეურნეობის განვითარება არ არსებობს. მიწის კონსოლიდაციის კუთხით კი კოოპერატივები დიდ როლს თამაშობენ. ჩვენს ფერმერებში ერთგვარი სკეპტიკური დამოკიდებულება იყო კოოპერატივებთან მიმართებაში. კოოპერატივები კოლმეურნეობების გადმონაშთებად აღიქმებოდა, თუმცა ეს არის ის ფორმაცია, რაც მცირემიწიან ფერმერებს წარმოების მოცულობის გაზრდაში ეხმარება. 400-ზე მეტი კოოპერატივი დარგისტრირდა და ყველაფერს გავაკეთებთ, რომ კოოპერატივები ქმედითი და შემოსავლიანები იყვნენ,“ - განაცხადა სოფლის მეურნეობის მინისტრის მოადგილემ ნოდარ კერესელიძემ.