ე.წ. ქუჩის ბავშვებისათვის ქუთაისში დღის ცენტრი იხსნება

ქუთაისში ქუჩაში მცხოვრები და მომუშავე ბავშვებისათვის დღის ცენტრის გახსნა იგეგმება.
ცენტრს არასამთავრობო ორგანიზაცია World vision აწყობს.
როგორც სოციალური მომსახურების სააგენტოში აცხადებენ, ქუთაისში ცენტრი უახლოეს მომავალში ამოქმედდება. ქალაქში ივლის მობილური ჯგუფი, რომელიც ცენტრისათვის ბენეფიციარებს შეარჩევს.
კრიზისში მყოფი ბავშვებისათვის გახსნილ ცენტრში მოხვედრილ ქუჩაში მცხოვრებ და მომუშავე ბავშვს ადგილზე არაფორმალური განათლების მიღება და საკვებით უზრუნველყოფა შეეძლება. დღის ცენტრში ბავშვის გაჩერების პერიოდი შეზღუდული არ არის.
ცნობისთვის, ქუთაისში, ისევე როგორც მთელ საქართველოში ე.წ. ქუჩის ბავშვების საკითხი მწვავედ დგას. მძიმე მატერიალური პირობების გათვალისწინებით ქუჩაში გამოსული არასრულწლოვნები მოკლებული არიან განათლების მიღების შესაძლებლობას, რადგან მთელ დღეს მოწყალების მოლოდინში ხელგაწვდილი ატარებენ.
Unicef-ის ბოლო, 2013 წლის კვლევის მიხედვით, საქართველოში ბავშვთა სიღარიბის მაჩვენებლები საკმაოდ მაღალია. კერძოდ, 50 000 ბავშვი უკიდურეს სიღატაკეში ცხოვრობს და დღის განმავლობაში გაწეული ხარჯი 2 ლარზე ნაკლებია.