99 წლის მოხუცი ქუთაისის ადგილობრივ ხელისუფლებას თხოვნით მიმართავს

ქუთაისში, ახალგაზრდობის გამზირზე მცხოვრები 99 წლის თინა ცარციძე ადგილობრივ ხელისუფლებას დახმარებას სთხოვს.

როგორც ცარციძემ განაცხადა, გასული წლის დეკემბერში მასთან უცნობი პირები მივიდნენ და უთხრეს, რომ საახალწლოდ დახმარებას იმ შემთხვევაში მიიღებდა, თუ ის სანაცვლოდ ხელს რამდენიმე ფურცელზე მოაწერდა.

მოხუცი ქალბატონის მტკიცებით, არ იცის იმ ადამიანების არც სტატუსი და არც ვინაობა, რომლებიც დახმარებას დაჰპირდნენ.

„არ ვიცი ხელი რაზე მომაწერინეს, თუ არ მეხმარებოდნენ, რაღას მატყუებდნენ. შეიძლება უფროსმა გამოატანა მათ ჩემი დახმარება, მაგრამ ჯიბეში ჩაიდეს. ჩემზე გაჭირვებული არავინ არის და ჩემს დახმარებას, რომ ვინმე მიითვისებს. ასევე იმისიც მეშინია სხვა ისეთ დოკუმენტაციაზე ხომ არ მომაწერინეს ხელი, რომლის გამოც მე და ჩემს ოჯახს პრობლემები შეექმნას“,- აცხადებს თინა ცარციძე.

99 წლის მარტოხელა ქალბატონი ადგილობრივი ხელისუფლებისგან ითხოვს, დაინტერესდნენ პრობლემით და გაარკვიონ, თუ სად წავიდა ის საჩუქრები, რომლის სანაცვლოდაც მან ხელი გაურკვეველ დოკუმენტაციას მოაწერა.

ქუთაისის სოციალურ სამსახურში აცხადებენ, რომ ქალბატონი სიცოალურმა მუშაკებმა ბოლო რამდენიმე წლის განმავლობაში 4-ჯერ შეამოწმეს, თუმცა მას საარსებო შემწეობის მისაღებად საჭირო ქულები არ აღმოაჩნდა.

რაც შეეხება მოხუცის განცხადებას იმის შესახებ, რომ მას უცნობი პირები დახმარებას დაპირდნენ და არ შეასრულეს, უწყებაში აცხადებენ, რომ ამის შესახებ ინფორმაციას არ ფლობენ.