"ქუთაისში არსებული ნაგვის ურნები ქალაქის მერიასავით ძირგავარდნილია"

პარტია "თავისუფალი საქართველოს" იმერეთის ორგანიზაციის თავმჯდომარემ გოგი წულაიამ პარლამენტის მიერ "ნარჩენების მართვის კოდექსში" შეტანილი ცვლილებები გააპროტესტა.
გოგი წულაიას თქმით, პარლამენტმა კანონპროექტი მიიღო, თუმცა მუნიციპალიტეტები აღნიშნული კანონპროექტისათვის მზად არ არის.
"ჯარიმები გაამკაცრეს, თუმცა ქუთაისის მერია ამისთვის მზად არ არის. ქალაქის მერიის წინ, ცენტრალურ ბულვარში ნაგვის თითქმის ყველა ურნა ძირგავარდნილია. ქუთაისის მერია და ამ ქალაქში არსებული ურნები ერთმანეთს ჰგავს. ჯარიმებს, რომ ზრდი იმაზეც, ხომ უნდა იზრუნო, რომ შენს ქალაქში ნაგვის ურნები გქონდეს,"- აცხადებს წულაია.
წულაის ბრალდებებს ქალაქის მერიის კეთილმოწყობის სამსხურის უფროსი მალხაზ ბასილაძე ეხმაურება, მისი თქმით ქალაქის მერია წელს ნაგვის ურნებს შეიძენს.

შეგახსენებთ, რომ ახალი წლიდან „ნარჩენების მართვის კოდექსში” ცვლილებები შევიდა. ცვლილებების მიხედვით, მკაცრდება ჯარიმები გარემოს დაბინძურებისთვის, ჯარიმების მინიმალური ოდენობა 50 ლარით, მაქსიმალური კი – 5 000 ლარით განისაზღრება.