"პოლიციელები სასიკვდილოდ სცემენ ახალგაზრდებს, შემდეგ ტყეში მიჰყავთ და ხეზე ჩამოკიდებულს ტოვებენ თითქოს თავი მოიკლა"

სამტრედიაში ოჯახის წევრები და ახლობლები პოლიციელების მიერ ნაცემ 19 წლის გიორგი ადეიშვილს ეძებენ.
19 წლის ახალგაზრდის დედა თეა თელია აცხადებს, რომ მისი შვილი სამართალდამცავებმა გუშინ იმ დროს სცემეს, როდესაც ის მეგობრიდან სახლში ბრუნდებოდა. ხოლო იმ დროს, როდესაც ადეიშვილი ნარკოლოგიური შემოწმების მიზნით პოლიციის განყოფილებაში უნდა გადაეყვანათ, 19 წლის ახალგაზრდა პოლიციელებს გაექცა.
„ჩემი შვილი ერთხელ უკვე დააკავეს სამართალდამცავებმა და წამალი ჩაუდეს. პირობით იყო გათავისუფლებული, თუმცა გამომძიებელი ზვიად თევზაძე ემუქრებოდა, რომ ციხეში მაინც დაალპობდა. ხშირად გვსმენია, რომ პოლიციელები სასიკვდილოდ სცემენ ახალგაზრდებს, შემდეგ ტყეში მიჰყავთ და ხეზე ჩამოკიდებულს ტოვებენ თითქოს თავი მოიკლა,“ - ამბობს გიორგი ადეიშვილის დედა თეა თელია.
გიორგი ადეიშვილის მეგობრებმა სოციალურ ქსელში გვერდი შექმნეს, რომლის საშუალებით ადამიანებს მოუწოდებენ ადეიშვილთან დაკავშირებული ნებისმიერი ინფორმაცია ოჯახს აცნობონ.
შინაგან საქმეთა სამინისტროს პრესსამსახურში კი განმარტავენ, რომ პოლიციას ადეიშვილთან შეხება არ ჰქონია. უფრო მეტიც, ნარკოლოგიური შემოწმების მიზნით ახალგაზრდის პოლიციის განყოფილებაში წაყვანა არავის უფიქრია.
„ნარკოლოგიურში პოლიციელებმა გიორგი ადეიშვილის მეგობარი გადაიყვანეს. ადეიშვილის ოჯახს სამართალდამცავებისათვის დახმარება არ უთხოვია. მისმა დედამ პოლიციაში მხოლოდ ის იკითხა, დაკავებული ხომ არ არისო,“ - აცხადებენ უწყების პრესსამსახურში.