ავტოსაგზაო შემთხვევის შედეგად გარდაცვლილები ქუთაისის სამხარაულის ექსპერტიზის ბიუროში გადაჰყავთ

ავტოსაგზაო შემთხვევის შედეგად გარდაცვლილები ქუთაისის სამხარაულის ექსპერტიზის ბიუროში გადაჰყავთ.
როგორც topnews.com.ge-ს განუცხადეს, გარდაცვლილებს ექსპერტიზა დილამდე ჩაუტარდებათ, შემდეგ კი ზუგდიდში, საკუთარ სახლებში გადაასვენებენ.

"ალბათ, ცოტა ხანში მოვლენ სპეციალური რეანომობილები და ჩვენი ნათესავების ცხედრებს ქუთაისიში გადასვენებენ. როგორც გვითხრეს, დილით მათ უკვე ზუგდიდში გადმოასვენებენ", - აცხადებენ გარდაცვლილების ახლობლები.

სოფელ მარანის სიახლოვეს ავტობუსისა და მატარებლის შეჯახების შედეგად 4 ადამიანი დაიღუპა, ათეულობით კი დაშავდა. დაშავებულთაგან 3 აბაშის, 9 კი სამტრედიის რაიონულ საავადმყოფოში არიან გადაყვანილი, მათგან რამდენიმე მცირეწლოვანია.

დაშავებულების ახლობლების განცხადებით, მათ ავტობუსი ჰქონდათ დაქირავებული და სოფელ მარანში ახლობელთან სტუმრად იმყოფებოდნენ, რომელსაც ბავშვი შეეძინა. უბედური შემთხვევა კი მაშინ მოხდა, როდესაც სტუმრები ზუგდიდში ბრუნდებოდნენ, სოფლის სიახლოვეს სარკინიგზო გადასასვლელზე, სადაც გზის გადასაკეტი მოწყობილობა არ იყო, მატარებელი და ავტობუსი ერთმანეთს შეეჯახნენ.