"ნაციონალების" ლობირებაში მიჩნეულ თერჯოლის საკრებულოს თავმჯდომარეს აქციით დაუპირისპირდნენ

თერჯოლაში „ნაციონალების“ მფარველობაში მიჩნეული საკრებულოს თავმჯდომარის გადადგომას ითხოვენ.
საკრებულოს თავმჯდომარის მალხაზ გურგენიძის გადადგომის მოთხოვნით გამართული აქციის მონაწილეები აცხადებენ, რომ გურგენიძემ, რომელიც ამავდროულად საკონკურსო-საატესტაციო კომისიის თავმჯდომარეა, კონკურსის შედეგად „ნაციონალი“ მეგობრები დაასაქმა.
აქციის მონაწილეები იმასაც აცხადებენ, რომ გურგენიძის საკრებულოს თავმჯდომარედ დანიშვნას თავად „ქართული ოცნების“ დეპუტატები ეწინააღმდეგებოდნენ.
„ეს კაცი სულით ხორცამდე „ნაციონალია“. თერჯოლის გამგეობასა და საკრებულოში მეგობრები დაასაქმა,“ - ამბობს აქციის მონაწილე ჯემალ ვარდანიძე.
აქციის მონაწილეთა ბრალდებების ადრესატი მალხაზ გურგენიძე აცხადებს, რომ თანამდებობის დატოვებას არ აპირებს. გურგენიძე იმასაც ამბობს, რომ თეჯოლის საკრებულოსა და გამგეობაში კონკურსი კანონის შესაბამისად ჩატარდა.