ქუთაისის მერიის სარეზერვო ფონდიდან ადმინისტრაციული სამსახურის უფროსის მეუღლეს დაეხმარნენ?

ქუთაისის მერიას სარეზერვო ფონდის თანხების არამიზნობრივ ხარჯვაში ადანაშაულებენ. აღნიშნულის მაგალითად პარტია „თავისუფალ საქართველო“-ს მერიის ადმინისტრაციული სამსახურის უფროსი ზვიად ჯავახიას მეუღლისათვის 1 000 ლარის გადარიცხვის ფაქტი მოჰყავს.
„საზოგადოებას წარმოვუდგენ მერის სარეზერვო ფონდის მხოლოდ ნაწილს, რომელშიც ასახულია როგორ იხარჯება თანხები ავია ბილეთების, საწვავის შეძენაზე და ადმინისტრაციული სამსახურის უფროსის მეუღლეს დახმარებაზე,"- აცხადებს გოგი წულაია.
ადმინისტრაციული სამსახურის უფროსის მეუღლის დახმარებასთან დაკავშირებით განმარტებას ზვიად ჯავახია აკეთებს. მისი თქმით, ადგილობრივი ხელისუფლება რუსეთში ავტოსაგზაო შემთხვევის შედეგად გარდაცვლილ ალეკო ზადოშვილს დაეხმარა.
„რუსეთში გარდაცვლილ ამ ახალგაზრდას საქართველოში ჩემი მეუღლის გარდა ახლობელი არავინ ჰყავდა. ამიტომ დავეხმარეთ და თანხა ჩემი მეუღლის ანგარიშზე ჩაირიცხა,"- ამბობს ზვიად ჯავახია